Ҳеш бир мүрәжат итибардан шетте қалмады

Сана: 12.06.2017  |  Муаллиф: Д.АБИБУЛЛАЕВ  |  Манба: «Еркин Қарақалпақстан» газетасы  |  Ўқилди: 1845Шарҳ 0

Өзбекистан Республикасы Президенти аппаратының физикалық ҳәм юридикалық шахслардың мүрәжатлары менен ислесиўди қадағалаў ҳәм муўапықластырыў хызмети тәрепинен республикамыз аймағында шөлкемлестирилген көшпели қабыллаўлардың гезектегиси Хожели районында болып өтти. Бул жерде Хожели, Нөкис районларының, Нөкис қаласының пуқаралары тийисли министрликлер менен ведомстволардың, кәрхана, шөлкем, мәкемелердиң басшылары тәрепинен қабыл етилип, олардың машқалалары, пикир ҳәм усыныслары тыңланды.

Илажда Қарақалпақстан Республикасы Жо­қарғы Кеңесиниң Баслығы М.Ерниязов, Өзбекистан Республикасы Президентиниң мәмлекетлик кеңесгөйи Т.Худайбергенов, Өзбекистан Республикасы Президентиниң Қарақалпақстан Республикасындағы Халық қабыллаўханасының баслығы Ҳ.Халимов шығып сөйлеп, орынлардағы Халық қабыллаўханалары тәрепинен Президентимиздиң 2016-жыл 28-декабрьдеги «Физикалық ҳәм юридикалық шахслардың мүрәжатлары менен ислесиў системасын түп-тийкарынан жетилистириў илажлары ҳаққында»ғы Пәрманының орынланыўын тәмийинлеў бағдарында әмелге асырылған жумыслар, алда турған ўазыйпаларға тоқтап өтти.

Ҳақыйқатында да, шөлкемлестирилген көшпели қабыллаўлар әмелге асырылып атырған кең көлемдеги жумыслар менен биргеликте шешимин күтип турған машқалалардың бар екенлигин көрсетти. Хожели районының турғынларынан Өзбекистан Республикасы Президентиниң Халық қабыллаўханаларына быйылғы жылдың өткен айлары даўамында 560 мүрәжат келип түскен болса, соннан 500 ге жақыны бүгинги күнге шешимин тапқан. Деген менен, турақ жай мәселеси, коммуналлық хызмет, бәнтлик мәселесинде көплеген мүрәжатлар келип түспекте. Көшпели қабыллаўлар барысында тараў басшылары тәрепинен 100 ден аслам пуқара қабыл етилип, олардың көпшилигиниң мүрәжаты усы жердиң өзинде шешимин тапты. Атап айтқанда, «Ақман­ғыт» елатлық пуқаралар жы­йыны аймағында жасаўшы Элмира Назарханова өткен жылдың июнь-август айлары аралығында Нөкис районындағы «Гүлбағ» балалар дем алыў орайында ислеп, өзине тийисли болған 716 мың сум ис ҳақысын усы күнге шекем ала алмай келген. Көшпели қабыллаўханаға келген оның бул мүрәжаты тараў басшылары тәрепинен үйренип шығылып, усы жердиң өзинде шешип берилди.

Усындай көшпели қабыллаўлар Елликқала районында да болып өтти. Бул жерде шөлкемлестирилген көшпели қабыллаўларда усы районнан тысқары, Төрткүл ҳәм Беруний районларының тур­ғынлары қатнасты. Усы күни министрликлер менен ведомстволардың, кәр­хана, шөлкем, мәкемелер басшылары тәрепинен Төрткүл районынан 33 пуқараның мүрәжаты қабыл етилип, соннан 11 и сол жердиң өзинде қанаатландырылды. Солардың бири райондағы А.Адакаев аўыл пуқаралар жыйынынан екинши топар майыбы Гүлсалтан Аманова Ташкент қаласына барып емленип қайтыўда қыйналып жүрген еди. Ол Өзбекистан Республикасы Денсаўлықты сақлаў минис­трлиги басшылары тәрепинен қабыл етилип, Ташкент медицина академиясынын 1-кардиоревматология бөлимине жеңилликли ордер менен тәми­йинленди.

Көшпели қабыллаўға Беруний районынан 26 пуқара мүрәжат еткен болса, соннан 15 и усы жердиң өзинде қанаатландырылды. Қалғаны тийисли тараў басшылары тәрепинен үйренип шығылып, жақын күнлерде шешимин табатуғын болды.

— Өмирлик жолдасым биринши топар майыбы Атахан Реймов ушын ма­йыплар арбашасын сорап тийисли мәкемелерге мүрәжат етсемде, усы күнге шекем шешилмей киятырған еди,-дейди Елликқала аўыл пуқаралар жыйыны турғыны Мәрям Реймова. — Бүгинги көшпели қабыллаўда мениң машқалам унамлы шешилип, майыплар арбашасы берилди. Буның ушын Президентимизге, илажды шөлкемлестириўшилерге шексиз миннетдаршылық билдиремен.

Өзбекистан Республикасы Президентиниң Қарақалпақстан Республикасындағы Халық қабыллаўханасы қәнигелериниң атап өткениндей, үш күн даўамында  өткерилген илажда жәми 500 ге жақын пуқараның мүрәжаты қабыл етилип, соннан 200 ден аслам мүрәжат сол жердиң өзинде унамлы шешилди. Қалғанлары тийисли тараў қәнигелери  тәрепинен үйренип шығылып, жақын күнлерде шешимин табады. Шөлкемлестирилген көшпели қабыллаўлар мәмлекетлик уйымлар менен пуқаралар арасында байланысты еле де беккемлеўге хызмет етиў менен бирге, халық пенен тығыз бирге ислесиўде, олардың дәртин тыңлап, маш­қалаларын шешиўде әҳми­йетли ўазыйпаларды белгилеп берди.

Д.АБИБУЛЛАЕВ,
Қарақалпақстан хабар агентлигиниң хабаршысы.

Манба: «Еркин Қарақалпақстан» газетасы Рәсмий веб-сайты