Song'i so'zler

Сана: 14.07.2019  |  Муаллиф: Nishan Jalg'asbayev  |  Рукн: Кичик ҳикоялар  |  Ўқилди: 1974Шарҳ 0

Ayimxan tu's ko'rdi, tu'sine perishte endi ha'm og'an endi qalg'an o'miri dawaminda jigirma so'z so'ylese ma'ngilik du'nyag'a ra'wana boliwin uqtirdi.

Ayimxan bul tu'ske isendi ha'm awzinan birde-bir shiqqan joq. Ol tek turmisqa shig'ar waqit ‒ molla ta'repinen ku'yewine zayip boliwga irzaliq soralg'anda g'ana "irzaman" dep aytti.

Endi onin' iqtiyarinda on tog'iz so'zi bar.

Tan'nin' atiwi, ku'nnin' batiwi menen ku'nler de a'ste-aqirinliq penen o'te basladi. Bul waqit ishinde Ayimxang'a Quday Taala perzent inam etti. Ol balali bolg'annan son' bul jalg'anshi dunyadan ma'ngilik du'nyag'a ra'wana boldi. Qaytis bolg'annan keyin, haqiyqiy du'nyag'a barg'an demde "Ne ushin eskertsem de so'z so'yledin'" dep soradi Perishte Ayimxannan. Sonda Ayimxan perishtege eskertilgen waqtinan baslap so'ylegen jigirma so'zin ja'ne bir ma'rte qaytaladi ha'm aradan hiyle waqit o'tkennen son' perishte oni o'ltirip qa'te qilg'anin, oni da'rhal jayina, denesine qaytariw kerek ekenligin an'ladi ha'm oni ja'ne bul jalg'anshi du'nyag'a jiberdi. Perishtenin' bunday etiwine sebep Ayimxannin' tiri waqtinda aytqan on tog'iz so'zi, al sol on tog'iz so'z bolsa to'mendegishe;

Aynalayin appag'im-ay
Qizlar kiygen qalpag'im-ay
Qatarin'nan kem bolmay-ay
Ashilg'ay balam bul baxtin'-ay
Ha'yyiw,ha'yyiw, ha'yyiwim-ay
Ashilg'ay balam bul baxtin'-ay

Ayimxan bir so'zi o'mirlik joldasina, al qalg'an on tog'iz so'zi bolsa, onin' quwanishi ha'm o'mirinin' mazmuni, perishtedey pa'k perzentine arnalg'an edi.

Nishan Jalg'asbayev,
do’retpesinen.