Sariplang'an pullar

Сана: 14.07.2019  |  Муаллиф: Nishan Jalg'asbayev,  |  Рукн: Кичик ҳикоялар  |  Ўқилди: 1992Шарҳ 0

‒ Men bergen 10000 so’mdi qayaqqa jiberdin' ‒ dedi o'gey ana g'a'zep penen mo'ldiregen ko'zlerinen tamshi-tamshi bolip jas tamil turg'an perzentine.

‒...‒ ele mawqimin basip u'lgermegen bala o'gey anasina u'nsiz termilip turaberdi.

‒ Ayt qayaqqa jiberdin pullardi ‒ ananin' bul so'zleri aldingidan da beter ashiw menen shiqti.

‒...‒ degen menen, bul rette de perzentten u'm shiqpadi ha'm anasina jilamsirap qarap turdi.

‒ Aqirg'i ma'rte sorawim, qayaqqa joq qildin' 10000di ‒ dedi ana ha'm balasi ja'ne hesh na'rse aytpasa bir na'rse qilip qoyiwin bildirgendey.

‒...‒ bul rette de perzentten saza joq.

‒ Ele solayma, onda o'zin' bil- dep endi g'ana mushin tu'yip atirg'an anani sirttan birden kelip qalg'an molla toqtatip qaldi.

‒ Kelin onday qilma, senin' bul isin' gu'na ‒ dedi molla saldamli dawis penen- jetimdi xorlag'an, Ta'n'rige qiyanet etken menen barabar.

‒ Haw men o'zimnen-o'zim qilip atirg'an joqpan bul isti, bul 10000 so’mdi joq qilip jiberip, endi qayaqqa jibergenin aytpay atir ‒ dedi ana o'zinde ayip joq ekenligin bildirmekshidey.

‒ Bilemen, barlig'inan xabarim bar- dedi molla ‒ qay jerge sariplag'anin da bilemen.

Arada biraz u'nsizlik boldi, bul u'nsizlikti mollanin' basiqliq penen so'ylegen saldamli dawisi buzdi.

‒ Balam ayt pullardi ne ushin sariplag'anin'di ‒ dedi molla ha'm qus balasina qanday mehir ko'rsetse, ol da tap sonday mehir-mu'riwbet penen jetimnin' basinan siypaladi.

‒ Ayt qa'ne qayaqqa sawdin' ‒ ananin' endi bag'anag'i g'a'zebi biraz tarqag'an, ol tek pullar qayaqta ekenine qiziqsinip turg'an edi.

‒ Ayt balam, aytaber ‒ dedi molla balanin' qalin' o'sken shashinan siypap.

‒ Pullardi juma ku'ni meshittin' aldindag'i qutishag'a taslap edim- bala zorg'a qorqip-qorqip juwap berdi.

‒ Ba'rekella, endi ayt balam, ol jerge pullardi ne ushin tasladin' ‒ molla perzenttin' juwabinan son' bet-a'lpetinde pu'tkilley o'zgeshe keypiyat engen anag'a bir qarap qoydi.

‒ Pullardi meshitke taslasam ata-anam qaytip keledi dep oyladim. Men jaqsi bala bolip, jaqsi isler islesem ata-anam qasima qaytip keledi dep oylag'an edim ‒ balanin' bul so'zlerin esitip ananin' kewili eljirep, ko'zlerinen jasi atilip shiqti.

Usi waqiyadan son' ana balanin' arasindag'i mu'nasebet pu'tkilley o'zgerdi. Bala o'zin endi jetim dep sanamaytug'in, ana da o'mirinde shin ma'nisinde baxitti tapqan edi...

Nishan Jalg'asbayev,
do’retpesinen.